9 Oktober 2020

Rahul en Lorette – Gebedsbrief Nr 3/2020

Liewe Vriende,

Dis ‘n voorreg om weer met julle te kan gesels. Ons vertrou dat julle gesond is en dat dit goed gaan. Die wêreld is in ‘n groot mate nog steeds op sy kop gekeer agv die Pandemie, maar daar is ook soveel getuienisse van God se groot werk en genade. Ons is die Here dankbaar vir die voorreg om nou te mag wees waar Hy ons wil hê, al is dit nie elke dag maklik nie en moet ons dinge anders doen. 1Timoteus 1:12 stel dit mooi: “En ek dank Hom wat my krag gegee het, Christus Jesus, onse Here, dat hy my getrou geag het en in die bediening gestel het.” Net so is ons baie dankbaar vir elkeen van julle wat saam met ons in hierdie spesifieke bediening is!

Ten spyte van die Covid-19 syfers hier in Indië voel dit soms asof mense besluit het hulle het nou genoeg gehad van reëls en regulasies en gaan normaalweg hul gang begin gaan. Die regering het ook van die regulasies gelig en die wassery mag nou van Maandae tot Saterdae oop wees. Ons het stil dae en lekker besige dae. In ‘n tyd waarin soveel besighede hul deure moes sluit is ons so ontsettend dankbaar vir die Here se hand van genade oor “The Turning Point.”

Rahul en die Sorgsentrum personeel besoek ons kinders in die slumgebiede en by die stasie twee maal per week. Daar word seker gemaak dat almal gesond is en dat hulle genoeg kos het. Al kan ons nog nie as ‘n groep byeen kom nie, vertrou ons steeds die Here dat hierdie besoeke ‘n getuienis is van God se liefde en omgee vir elkeen van hulle. Daar kon ongelukkig geen verdere vordering gemaak word in ons soeke na ‘n nuwe plek vir ‘n sorgsentrum nie. Alle skole in Indië is steeds gesluit en geen gesprekke kan dus gevoer word met die leierskap van die skool waar ons graag klaskamers wil huur nie. Hierdie is ‘n groot gebedsversoek waarvoor ons net die Here kan vertrou.

Rahul deel Dinsdae ‘n boodskap met die personeel van beide die sorgsentrum en wassery. Dit is ook ‘n geleentheid waar hulle gebedsversoeke deurgee en bemoedig kan word. Ons bid dat elke woord uit die Here se hart op goeie grond sal val en vrug sal dra.

Hier by die huis het ons tuisonderrig seisoen na 14 jaar tot ‘n einde gekom. Nadia is nou ook in Hebron Skool. Op die oomblik is beide Priyanka en Nadia by die huis en alle klasse is online. Daar is tans geen definitiewe aanduiding wanneer die skool weer sal mag open nie. Dis nie altyd maklik vir die twee nie, maar ons is dankbaar vir die luukshede van rekenaars en internet en dat hulle studies kan voortgaan. Ons bid vir baie wysheid om hulle in hierdie onsekere tyd te bemoedig en te begelei.

Ons is die Here so dankbaar vir elkeen van julle! Mag ons Vader julle bewaar en beskerm en seën…

Met baie liefde,

Rahul, Lorette, Priyanka en Nadia

Rahul Jaguasi