Josua 4:1-7

Datum: 6 September 2026 (Oggenddiens)

Prediker: Johan Janse van Rensburg

“Vir ‘n LEWENDIGE UITSENDING van die preek kliek hier om dit te kyk”

Preek sal gepubliseer word sodra beskikbaar

Daar is iets besonders aan mense se vermoë om te vergeet. Ons vergeet maklik waar ons sleutels is, waar ons ons selfoon neergesit het, of wat iemand ons vyf minute gelede gevra het om te doen. Maar soms vergeet ons ook iets baie belangrik: ons vergeet wat God reeds vir ons gedoen het.  Ons raak so besig met wat volgende is, dat ons vergeet wat God reeds gedoen het. Ons kyk so ver vorentoe dat ons nie meer terugkyk na die plekke waar God ons gedra het nie. Ons jaag die volgende seisoen binne sonder om eers stil te staan by die vorige een.

Dit is presies wat ons in Josua 4 sien. Israel het pas deur die Jordaanrivier getrek. God het ’n wonderwerk gedoen. Die rivier wat normaalweg ’n hindernis was, het oopgegaan en die volk kon op droë grond deurtrek. Hulle het van die een kant van die rivier na die ander kant beweeg. Hulle was op die punt om ’n nuwe seisoen binne te gaan.

Maar voordat hulle verder gaan, sê God vir Josua om iets te doen. Hy sê vir hom om twaalf mans te kies, een uit elke stam, en elkeen moet ’n klip uit die middel van die Jordaanrivier neem. Hulle moes hierdie twaalf klippe saambring en dit op die plek waar hulle sou oornag, neersit.

Hoekom?

Want God weet hoe maklik mense vergeet.

God sê eintlik vir hulle: “Stop. Pause. Onthou.”

Die klippe in Josua 4 was meer as net klippe. Hulle was ’n herinnering. Hulle was ’n fisiese teken wat vir Israel gesê het: “Moenie vergeet nie. God het ons hierheen gebring.” Elke keer wanneer iemand daardie klippe sou sien, sou die vraag kom: “Wat beteken hierdie klippe?” En dan sou die verhaal vertel word.

Ons almal het sulke klippe.

Dalk is daar ’n klip in jou lewe wat vir jou sê: “God was getrou.” Dalk is jou klip ’n verhouding. Dalk is dit ’n kind. Dalk is dit ’n moeilike jaar waardeur jy gekom het. Dalk is dit ’n gebed wat God beantwoord het. Dalk is dit ’n oomblik van verlies waarin jy ontdek het dat God jou steeds vasgehou het.

Maar ’n klip is net ’n klip totdat iemand die storie vertel.

Wanneer jy die klip sien en die verhaal onthou, word dit ’n gedenkteken. Dit herinner jou: “God was hier.”